ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສ ປປ ລາວ ພ້ອມຄະນະໄດ້ລົງຕິດ ຕາມກວດກາການປະຕິບັດ ມາດຕະການໃນການປ້ອງກັນ ແລະຄວບຄຸມການລະບາດ ຂອງພະຍາດໂຄວິດ-19 ຢູ່ບັນ ດາແຂວງພາກກາງແລະພາກ ໃຕ້ຂອງລາວ ພ້ອມທັງປຶກສາ ຫາລືກ່ຽວກັບການຮັບມື ແລະ ຄຸ້ມຄອງແຮງງານທີ່ເດີນທາງ ກັບຈາກປະເທດໃກ້ຄຽງທີ່ມີ ຈຳນວນຫຼວງຫຼາຍໃນປະຈຸ ບັນ.
ມາໃນຕອນເຊົ້າວັນທີ 27 ມີນາ 2020 ທີ່ສະໂມສອນ ຫ້ອງວ່າການປົກຄອງແຂວງ ສະຫວັນນະເຂດ, ທ່ານນາຍົກ ລັດຖະມົນຕີກໍ່ໄດ້ມີການພົບ ປະໂອ້ລົມ ແລະປຶກສາຫາລືກັບ ບັນດາທ່ານເຈົ້າແຂວງ- ຮອງ ເຈົ້າແຂວງ ແລະ ພາກສ່ວນຕ່າງໆທີ່ກ່ຽວຂ້ອງຂອງບັນດາແຂວງພາກກາງ-ພາກໃຕ້້ ກ່ຽວກັບການຮັບມືແຮງງານລຽບຊາຍແດນຂອງແຕ່ລະແຂວງ ທີ່ຜ່ານເຂົ້າມາແຕ່ລະດ່ານ ແມ່ນໄດ້ມີການຄຸ້ມຄອງ ແລະປະຕິບັດມາດຕະການຄືແນວໃດ?. ໂອກາດນີ້, ໃນພິທີ ກໍ່ໄດ້ຮັບຟັງການລາຍງານຄວາມຄືບໜ້າການປະຕິບັດມາດຕະການໂຕ້ຕອບພະຍາດໂຄວິດ-19 ແລະສະພາບການຄຸ້ມຄອງຈັດສັນໃນການກັກກັນໂຕແຮງງານ ທີ່ເດີນທາງກັບປະເທດຂອງແຕ່ລະແຂວງ.

ຈາກນັ້ນ, ທ່ານ ທອງລຸນ ສີສຸລິດ ກໍ່ໄດ້ໃຫ້ກຽດກ່າວໂອ້ລົມ ຊຶ່ງກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍການນຳຂອງແຂວງ ແລະນະຄະສະເພາະກິດ ເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ໃນແຕ່ລະແຂວງ ທີ່ໄດ້ເປັນເຈົ້າການໃນການຈັດຕັ້ງປະຕິບັດວຽກງານທີ່ໄດ້ຮັບມອບໝາຍໄດ້ເປັນຢ່າງດີ ໂດຍສະເພາະແມ່ນການຮັບມືກັບກ້ອນກຳລັງຊາວຜູ້ໄປອອກແຮງງານຢູ່ຕ່າງປະເທດ ເຊິ່ງຜ່ານການກວດກາເຫັນວ່າແຮງງານສ່ວນຫຼາຍ ແມ່ນບໍ່ພົບເຊື້ອພະຍາດດັ່ງກ່າວ ມີພຽງກໍລະນີສົງໄສຕິດເຊື້ອເທົ່ານັ້ນ ແຕ່ເຮົາກໍ່ຍັງວາງໃຈບໍ່ໄດ້ ໃນນີ້ ໃຫ້ພວກເຮົາທຸກຄົນໃນທົ່ວສັງຄົມ ຖືເອົາພະຍາດໂຄວິດ-19 ເປັນສັດຕູທີ່ຮ້າຍກາດຂອງປະເທດ ແລະໃຫ້ພ້ອມກັນເຮັດສົງຄາມກັບມັນຢ່າງສຸດກຳລັງຄວາມສາມາດຂອງພວກເຮົາ. ພ້ອມນີ້, ທ່ານ ນາຍົກ ໄດ້ເນັ້ນຕື່ມບາງບັນຫາສຳຄັນວ່າ: 1. ໃຫ້ຈຳກັດສຳລັບຜູ້ທີ່ຕ້ອງການກັບເຂົ້າມາລາວເປັນຕົ້ນແມ່ນນັກສຶກສາ ແລະຜູ້ທີ່ມີອາຊີບຄົງທີ່ແລ້ວ ໂດຍໃຫ້ພາກສ່ວນກ່ຽວຂ້ອງ ແຈ້ງໄປຍັງເຂົາເຈົ້າໃຫ້ຢູ່ສາກ່ອນ, 2. ໃຫ້ມີການກວດກາເຄັ່ງຄັດ ສຳລັບຄົນທີ່ຈະມາ ໂດຍຕ້ອງປະຕິບັດມາດຕະການທີ່ກະຊວງສາທານະສຸກວາງອອກຢ່າງເຂັ້ມງວດ ແລະຕ້ອງມີການຈັດຕັ້ງກັນຢ່າງຄັກແນ່ ອາດຈະເອົາລົດໄປຮັບເອົາເຂົາເຈົ້າເມື່ອສົ່ງແລ້ວ ຕ້ອງໄດ້ມອບໃຫ້ບ້ານຮັບຜິດຊອບຕໍ່ ໂດຍໃຫ້ບ້ານນຳໃຊ້ທ່າແຮງສັງລວມຂອງຕົນເຂົ້າມາຊ່ວຍ ແລະໃຫ້ເມືອງຊີ້ນຳຢ່າງໃກ້ຊິດ ໃນໄລຍະການກັກກັນໂຕພາຍໃນ 14 ວັນ ສຳລັບຄອບຄົວໃດທີ່ມີເງື່ອນໄຂໃນການກັກ ກໍ່ມອບໃຫ້ເຂົາເຈົ້າຮັບຜິດຊອບ ແຕ່ຕ້ອງໄດ້ມີການຕິດຕາມວ່າໄດ້ຈັດຕັ້ງປະຕິບັດມາດຕະການຢ່າງເຂັ້ມງວດຫຼືບໍ່ ເຊິ່ງມາດຕະການຢູ່ກັບເຮືອນ ແມ່ນຖືວ່າເປັນມາດຕະການທີ່ໄດ້ຮັບຜົນດີທີ່ສຸດ ຕາມທີ່ກະຊວງສາ ທາລະນະສຸກໄດ້ສຶກສາ, 3. ສຳລັບຜູ້ເຂົ້າມາບໍ່ຖືກຕ້ອງ ແມ່ນໃຫ້ເອົາໃຈໃສ່ເປັນພິເສດ ຕ້ອງໄດ້ນຳເຂົາເຈົ້າມາກວດກາ ແລະໃຫ້ປະຕິບັດມາດຕະການຄືກັບຄົນອື່ນໆ ໂດຍມອບໃຫ້ກຳລັງ ປກຊ-ປກສ ບ້ານເປັນເຈົ້າການ ເຊິ່ງພາຍຫຼັງກວດກາແລ້ວ ພົບກໍລະນີສົງໄສ ຕ້ອງໄດ້ແຍກອອກມາກັກກັນໂຕຕ່າງຫາກ ພ້ອມນີ້ ກໍ່ໃຫ້ນຳໃຊ້ລະບົບໂທລະໂຄ່ງບ້ານ ເພື່ອໂຄສະນາເຜີຍແຜ່ຂໍ້ມູນຂ່າວສານຈຳເປັນຕ່າງໆພາຍໃນບ້ານ ໂດຍສະເພາະແມ່ນກ່ຽວກັບພະຍາດດັ່ງກ່າວນີ້ຢ່າງຕໍ່ເນື່ອງ ເພື່ອໃຫ້ປະຊາຊົນບັນດາເຜົ່າພາຍໃນບ້ານຂອງຕົນມີຄວາມຮັບຮູ້ເຂົ້າໃຈເລິກເຊິ່ງຕໍ່ຜົນຮ້າຍຂອງພະຍາດໂຄວິດ-19 ພ້ອມນີ້ ກໍ່ໃຫ້ເອົາໃຈໃສ່ຄຸ້ມຄອງລາຄາສິນຄ້າ ໂດຍໃຫ້ພາກສ່ວນກ່ຽວຂ້ອງຕ້ອງໄດ້ລົງກວດກາເບິ່ງໂຕຈິງ ເພື່ອບໍ່ໃຫ້ມີການສວຍໂອກາດຂຶ້ນລາຄາສິນຄ້າໃນຍາມທີ່ປະເທດຊາດເກີດວິກິດຄືແບບນີ້ ເມື່ອພົບເຫັນກໍ່ໃຫ້ປະຕິບັດມາດຕະການຕໍ່ຜູ້ລະເມີດ ຄຽງຄູ່ກັນນີ້, ພາກລັດເຮົາ ກໍ່ຕ້ອງໄດ້ສົ່ງເສີມທຸລະກິດ SME ແລະຊຸກຍູ້ປະຊາຊົນໃນການຜະລິດເປັນສິນຄ້າໃຫ້ນັບມື້ນັບຫຼາຍຂຶ້ນ ເພື່ອສ້າງຄວາມເຂັ້ມແຂງແກ່ລະບົບເສດຖະກິດຂອງລາວເຮົາ.

ເຂດເສດຖະກິດພິເສດ ສຫວັນ-ເຊໂນ

ສາຍດ່ວນແຈ້ງເຫດສຸກເສີນ

ແຜນທີ່ ແຂວງສະຫວັນນະເຂດ

ຜູ້ເຂົ້າຊົມເວັບໄຊ໌

3.png7.png8.png7.png6.png
ມື້ນີ້41
ມື້ວານນີ້114
ອາທິດນີ້548
ເດືອນນີ້548
ລວມທັງໝົດ37876
06 ມີຖຸນາ 2020