ໃນວັນທີ 18 - 19 ຕຸລາ 2018 ຜ່ານມານີ້ ທີ່ສະໂມສອນຂອງເມືອງພີນ ພະນັກງານການນໍາ ແລະວິຊາການອ້ອມຂ້າງເມືອງໄດ້ຮັບການຝຶກອົບຮົມຍົກລະດັບຄວາມຮູ້ກ່ຽວກັບການຈາລະຈອນເອກະສານທາງເອເລັກໂຕຼນິກ ໂດຍການຮ່ວມເປັນຄະນະປະທານຂອງ ທ່ານ ບຸນດາໄລ ເຄນນາວົງ ກໍາມະການພັກແຂວງ ຫົວໜ້າພະແນກ ປກສ ແຂວງ, ທ່ານ ແກ້ວວິໄສ ອິນທິລາດ ຄະນະປະຈໍາພັກເມືອງ ຮອງເຈົ້າເມືອງໆພີນ ແລະທ່ານ ນາງ ຄໍາພີນ ແພງມະນີວົງ ຮອງຫົວໜ້າຫ້ອງວ່າການປົກຄອງແຂວງສະຫວັນນະເຂດຮ່ວມເປັນຄະນະປະທານ.

         ໃນການຈັດຝຶກອົບຮົມໃນຄັ້ງນີ້ມີຄູຝຶກຈາກຫ້ອງວ່າການແຂວງ ແລະພະແນກໄປສະນີໂທລະຄົມ ແລະການສື່ສານຂອງແຂວງສະຫວັນນະເຂດ ຈໍານວນ 05 ທ່ານ ຍິງ 01 ທ່ານ, ມີນັກສໍາມະນາກອນແຕ່ລະຫ້ອງການອ້ອມຂ້າງເມືອງເຂົ້າຮ່ວມ 78 ທ່ານ ຍິງ 34 ທ່ານ, ຫົວຂໍ້ໃນການຝຶກອົບຮົມໃນຄັ້ງນີ້ມີ 10ຫົວຂໍ້ຄື: ການໃຊ້ WhatsApp ສົ່ງຂໍ້ມູນຫາກັນຜ່ານຄອມ ແລະມືຖື, ການຕັ້ງຄ່າ Office ໃຫ້ເປັນ Phetsarath OT ອັດຕະໂນມັດ, ການໃຊ້ Cam Scaner ເພື່ອສົ່ງຮູບເອກະສານ,​ການໃຊ້ Adobe PDF ເພື່ອເຊັນເອກະສານຜານມືຖື, ການສ້າງ Gmail ແລະຮັບ-ສົ່ງອີເມລ, ການເກັບຂໍ້ມູນຢູ່ Google Drive ເພື່ອປ້ອງກັນຂໍ້ມູນເສຍ, ການໃຊ້ Google Doc ແປງຮູບ ແລະ PDF ໃຫ້ເປັນຕົວໜັງສື, ການໃຊ້ Google Doc ເວົ້າໃຫ້ຄອມພິມເອກະສານໃຫ້ ແລະການແປງ saysettha lao ມາເປັນ Phetsarath OT. ຫຼັງຈາກການຝຶກອົບຮົມແລ້ວນັກສໍາມະນາກອນຍັງໄດ້ຮັບໃບຢັ້ງຢືນການຝຶກອົບຮົມ ໂດຍເປັນກຽດມອບໃບຢັ້ງຢືນໃນຄັ້ງນີ້ແມ່ນ ທ່ານ ບຸນດາໄລ ເຄນນາວົງ ກໍາມະການພັກແຂວງ ຫົວໜ້າພະແນກ ປກສ ແຂວງ ທ່ານໄດ້ຍ້ອງຍໍຊົມເຊີຍນັກສໍາມະນາກອນທີ່ມີຄວາມຕັດສິນໃຈເຂົ້າຝຶກອົບຮົມໃນຄັ້ງນີ້. 

    ທີ່ເຫັນໄດ້ຄວາມໝາຍຄວາມສໍາຄັນຂອງການສື່ສານທາງເອເລັກໂຕຼນິກ ແລະທ່ານຍັງໄດ້ເນັ້ນໃກ້ນັກສໍາມະນາກອນນໍາໄປຜັນຂະຫຍາຍໃຫ້ເປັນຜົນປະໂຫຍດສູງສຸດໂດຍສະເພາະໃນຂົງເຂດວຽກງານຂອງຕົນ.

ເຂດເສດຖະກິດພິເສດ ສຫວັນ-ເຊໂນ