ໃນວັນທີ 09 ມີນາ 2018 ນີ້; ຢູ່ທີ່ສະໂມສອນຂອງເມືອງ ອາດສະພັງທອງ ໄດ້ຈັດພິທີປະກາດຮັບຮອງ12 ບ້ານ ເປັນບ້ານສາມັກຄີປອງດອງ ຄັ້ງທໍາອິດຂອງເມືອງ ອາດສະພັງທອງ ຂຶ້ນຢ່າງເປັນທາງການ ໂດຍພາຍໃຕ້ການເຂົ້າຮ່ວມຂອງທ່ານ ລໍາທອງ ຂອບສີລາວົງ ກໍາມະການພັກແຂວງ ເລຂາພັກເມືອງ ເຈົ້າເມືອງ ອາດສະພັງທອງ, ມີທ່ານ ສິນໄຊ ວົງລະຄອນ ກໍາມະການສູນກາງແນວລາວສ້າງຊາດຮອງປະທານແນວລາວສ້າງຊາດແຂວງ ສະຫວັນນະເຂດ, ນອກນັ້ນ ກໍ່ມີຄະນະປະຈໍາພັກເມືອງ ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ທະຫານ, ຕໍາຫຼວດຕະຫຼອດຮອດເລຂາຄະນະພັກຮາກຖານ, ເລຂາພັກບ້ານ, ນາຍບ້ານພາຍໃນ 12 ບ້ານກໍ່ໄດ້ເຂົ້າຮ່ວມ. ຈໍານວນ 12 ບ້ານມີຄື: ບ້ານ ແຈລະມ໋ອງ, ດົງກຶມ, ດົງນາຂາມ, ນາໄລ່ໂຄກ, ຫຼຽນໄຊ, ສີວິໄລ, ດົງກິໂລ, ດົງເຫັນ, ນາຈານ, ໂພນຜາງ, ນາແສນແກ້ວ ແລະ ບ້ານໜອງຫອຍ ເປັນບ້ານສາມັກຄີປອງດອງ. ໃນຈໍານວນ 12 ບ້ານ ປະກອບມີ ພົນລະເມືອງທັງໝົດ 17.473 ຄົນ, ຍິງ 8.813 ຄົນ, ມີ 2.303 ຫຼັງຄາ ແລະ ມີ 2.180ຄອບຄົວ. ໃນນີ້; ປະຊາຊົນສ່ວນຫຼາຍໄດ້ຢຶດຖືເອົາອາຊີບປູກຝັງ ແລະ ລ້ຽງສັດເປັນຕົ້ນຕໍ ນັບຖືສາສະໜາພຸດ 100%, ປະກອບມີ 3 ຊົນເຜົ່າຄື: ເຜົ່າລາວ, ເຜົ່າຜູ້ໄທ ແລະ ເຜົ່າບຣູມະກອງ. ຈາກນັ້ນກໍ່ໄດ້ມີການມອບໃບຢັ້ງຢືນຄອບຄົວ ແລະ ບ້ານສາມັກຄີປອງດອງໃຫ້ແກ່ 12 ບ້ານ ໃຫ້ກຽດມອບໂດຍທ່ານ ລໍາທອງ ຂອບສີລາວົງ ກໍາມະການພັກແຂວງ ເລຂາພັກເມືອງ ເຈົ້າເມືອງ ອາດສະພັງທອງ ແລະ ສິນໄຊ ວົງລະຄອນ ກໍາມະການສູນກາງແນວລາວສ້າງຊາດຮອງປະທານແນວລາວສ້າງຊາດແຂວງ ສະຫວັນນະເຂດ ໄດ້ຜັດປ່ຽນກັນມອບຢ່າງສົມກຽດ./.

ເຂດເສດຖະກິດພິເສດ ສຫວັນ-ເຊໂນ